വാഷിംഗ്ടൺ ഡിസി: ട്രംപ് ഭരണകൂടത്തിന്‍റെ വിലയിരുത്തലായി അമേരിക്കയിൽ ഇന്ന് ഇടക്കാല തെരഞ്ഞെടുപ്പ്. അധികാരത്തിലിരിക്കുന്ന പ്രസിഡന്‍റിന്‍റെ ഭരണത്തിനും നയങ്ങൾക്കും ജനങ്ങൾ നൽകുന്ന മറുപടിയാണ് അമേരിക്കയിൽ സാധാരണയായി ഇടക്കാല തെരഞ്ഞെടുപ്പുകൾ.
ജനപ്രതിനിധിസഭയിലെ മുഴുവൻ 435 സീറ്റുകളിലേക്കും സെനറ്റിലെ 34 സീറ്റുകളിലേക്കുമാണ് പോരാട്ടം. സഭകൾക്കു പുറമേ 36 സംസ്ഥാനങ്ങളിലെ 39 ഗവർണർ പദവികളിലേക്കും സംസ്ഥാന നിയമസഭകളിലേക്കും ഇതോടൊപ്പം വോട്ടെടുപ്പ് നടക്കുന്നുണ്ട്.
അടുത്ത പ്രസിഡന്‍റ് തെരഞ്ഞെടുപ്പിലേക്കുള്ള ദിശാസൂചികയായും ഈ ഫലം മാറും. 435 അംഗ ജനപ്രതിനിധി സഭയിൽ 218-214 എന്ന നേരിയ ഭൂരിപക്ഷവും 100 അംഗ സെനറ്റിൽ 53-47 എന്ന ഭൂരിപക്ഷവുമാണ് നിലവിൽ റിപ്പബ്ലിക്കൻ പാർട്ടിക്കുള്ളത്. ഇരുസഭകളുടെയും ഭരണം പിടിച്ചെടുക്കാൻ ഡെമോക്രാറ്റിക് പാർട്ടിക്ക് ഇനി നാല് സീറ്റുകൾ വീതം അധികമായി വിജയിക്കേണ്ടതുണ്ട്.
സെപ്റ്റംബറിലെ സർവേകൾ പ്രകാരം പ്രസിഡന്‍റ് ഡോണൾഡ് ട്രംപിന്‍റെ ജനപ്രീതി താഴ്ന്നത് റിപ്പബ്ലിക്കൻ പാർട്ടിക്കു തിരിച്ചടിയാണ്. വർധിച്ചുവരുന്ന ജീവിതച്ചെലവിൽ അസംതൃപ്തരായ ജനങ്ങളുടെ നിലപാട് തങ്ങൾക്ക് അനുകൂലമാകുമെന്ന പ്രതീക്ഷയിലാണ് ഡെമോക്രാറ്റിക് പാർട്ടി. ഈ തെരഞ്ഞെടുപ്പിൽ മത്സരിക്കുന്നവരിൽ 57 ഇന്ത്യൻ വംശജരായ സ്ഥാനാർഥികളും ഉൾപ്പെടുന്നു.
ഇറാനുമായി കരാറിന് സാധ്യതയെന്ന് ഡോണൾഡ് ട്രംപ്
വാഷിംഗ്ടൺ: യുഎസ് ഇടക്കാല തെരഞ്ഞെടുപ്പിന് പിന്നാലെ ഇറാനുമായുള്ള സംഘർഷം വീണ്ടും രൂക്ഷമാകുമെന്ന ആശങ്കകൾക്കിടയിൽ, ടെഹ്‌റാനുമായുള്ള നയതന്ത്ര കരാർ സാധ്യമാണെന്ന് യുഎസ് പ്രസിഡന്‍റ് ഡോണൾഡ് ട്രംപ്. യുഎസുമായി ഒരു ഉടമ്പടിയിലെത്താൻ ഇറാൻ ആഗ്രഹിക്കുന്നുണ്ടെന്നും ഒരു കരാർ യാഥാർത്ഥ്യമാകാൻ സാധ്യതയുണ്ടെന്നും അദ്ദേഹം വ്യക്തമാക്കി.
ഇടക്കാല തെരഞ്ഞെടുപ്പിന് മുന്നോടിയായി വാഷിംഗ്ടണിൽ മാധ്യമങ്ങളോട് സംസാരിക്കവെയാണ് ട്രംപിന്‍റെ പ്രതികരണം. തെരഞ്ഞെടുപ്പിന് തൊട്ടുപിന്നാലെ ഇറാനിൽ പുതിയ സൈനിക ആക്രമണങ്ങൾ നടത്താൻ ഉദ്ദേശിക്കുന്നുണ്ടോ എന്ന ചോദ്യത്തിന് “ഇല്ല” എന്നായിരുന്നു അദ്ദേഹത്തിന്‍റെ മറുപടി. ഇറാനുമായി നല്ല ചർച്ചകൾ നടന്നിട്ടുണ്ടെന്നും സമാധാനപരമായ ഒരു നയതന്ത്ര പരിഹാരത്തിലെത്താൻ സാധിക്കുമെന്ന ശുഭാപ്തിവിശ്വാസമുണ്ടെന്നും വൈസ് പ്രസിഡന്‍റ് ജെ.ഡി. വാൻസും വ്യക്തമാക്കി.
ഇറാനുമായി പരോക്ഷ ചർച്ചകൾ നടക്കുന്നുവെന്നും കർശന ഉപാധികളോടെ ഹോർമുസ് കടലിടുക്ക് വീണ്ടും തുറക്കാൻ തയ്യാറാണെന്നും ടെഹ്‌റാൻ സൂചന നൽകിയതിന് പിന്നാലെയാണ് ട്രംപിന്‍റെ പ്രസ്താവന. ഇരുരാജ്യങ്ങളും തമ്മിലുള്ള സംഘർഷ സാധ്യതകൾ കുറഞ്ഞുവരുന്നതിന്‍റെ സൂചനയായാണ് വിപണിയിൽ എണ്ണവില ഗണ്യമായി കുറഞ്ഞതെന്നും ട്രംപ് ചൂണ്ടിക്കാണിച്ചു.
കാലിഫോർണിയയിലെ തപാൽ വോട്ടുകൾ തടയാൻ ട്രംപ് ഭരണകൂടം സുപ്രീംകോടതിയിൽ
വാഷിംഗ്ടൺ: യുഎസ് ഇടക്കാല തെരഞ്ഞെടുപ്പിനായുള്ള വോട്ടെടുപ്പിന് തൊട്ടുമുമ്പ് കാലിഫോർണിയയിലെ ഏകദേശം 20,000 തപാൽ വോട്ടുകൾ എണ്ണരുതെന്ന ആവശ്യവുമായി ട്രംപ് ഭരണകൂടം യുഎസ് സുപ്രീംകോടതിയിൽ. പൗരത്വമില്ലാത്തവർ വോട്ട് ചെയ്തെന്ന ആരോപണം ഉന്നയിച്ചാണ് നീതിന്യായ വകുപ്പ് അടിയന്തര ഹർജി നൽകിയത്.
നേരത്തെ ഫെഡറൽ അപ്പീൽ കോടതിയും ജില്ലാ കോടതിയും സർക്കാരിന്‍റെ ഈ ആവശ്യം തള്ളിയിരുന്നു. വോട്ടെടുപ്പ് പുരോഗമിക്കുന്ന ഘട്ടത്തിൽ വോട്ടുകൾ വേർതിരിക്കുന്നത് വോട്ടർമാരെ തടയുന്നതിനും തെരഞ്ഞെടുപ്പ് പ്രക്രിയയിൽ ആശയക്കുഴപ്പം സൃഷ്ടിക്കുന്നതിനും ഇടയാക്കുമെന്ന് നിരീക്ഷിച്ചാണ് കീഴ്‌ക്കോടതികൾ ട്രംപ് ഭരണകൂടത്തിന്‍റെ ആവശ്യം നിരസിച്ചത്. തുടർന്നാണ് കേസ് സുപ്രീംകോടതിയുടെ പരിഗണനയിലേക്ക് എത്തിയത്.
കാലിഫോർണിയയിലെ തെരഞ്ഞെടുപ്പ് അധികൃതർ തയാറാക്കിയ വോട്ടർ പട്ടികയിൽ കൃത്യതയില്ലെന്നും സംശയമുള്ള വോട്ടുകൾ പരിശോധന പൂർത്തിയാകുന്നതുവരെ എണ്ണരുതെന്നുമാണ് ഭരണകൂടത്തിന്‍റെ വാദം. എന്നാൽ, മതിയായ തെളിവുകളില്ലാതെ വോട്ടുകൾ മാറ്റിനിർത്തുന്നത് പൗരന്മാരായ വോട്ടർമാരുടെ അവകാശം ലംഘിക്കലാകുമെന്ന് കാലിഫോർണിയ സംസ്ഥാന അധികൃതർ വ്യക്തമാക്കുന്നു.
കോൺഗ്രസിന്‍റെ (യുഎസ് പാർലമെന്‍റ്) നിയന്ത്രണം ആർക്കെന്ന് തീരുമാനിക്കുന്ന നിർണായക ഇടക്കാല തെരഞ്ഞെടുപ്പിലെ അവസാനഘട്ട വോട്ടെടുപ്പ് നടക്കാനിരിക്കെയാണ് ഈ നിയമപോരാട്ടം.
